ABU RAYXON BERUNIY

ABU RAYXON BERUNIY

Beruniy (to`liq ismi — Abu Rayxon Beruniy Muhammad ibn Ahmad)— o`rta asrning buyuk qomuschi olimi. U Xorazm o`lkasining Qiyot shahrida tug`ilgan. Qiyot Amudaryoning o`ng qirg`ogi — hozirgi Beruniy shahrining o`rnida bo`lgan, u yaqin vaqtlargacha Shobboz deb atalgan.

Beruniy ota-onasidan juda yosh etim qolgan va Iroqiylar xonadonida tarbiyalangan. Iroqiylarning oxirgi vakili Xo­razmshoh Abu Abdulloh Muham­mad ibn Ahmad ibn Iroq hisoblanadi. Xorazmshoxning jiyani— amakisining o`g`li Abu Nasr Mansur ibn Iroq Beruniyning ustozi edi.

Beruniy juda yoshligidan ilm va fanga qiziqadi. U sevgan fanlar — astronomiya, matema­tika, geodeziya, geografiya va minerologiya edi. U o`zining «Geodeziya» asarida 990 yil Qiyot shahrining geografik kengligini aniqlaganini yozadi. Ma`lumki, geografik kenglikni aniqlash uchun geografiya, matematika va astronomiyadan etarlicha bilimga ega bo`lish lozim.